დამკვეთი: ყვარელი ედენი

პროგრამა: სასტუმრო და მეღვინეობა | რეკონსტრუქცია | 570,000 კვ.მ

გუნდი: დევი ქიტუაშვილი, გოგიკო საყვარელიძე, მარია ფელანგია, უჩა ზღუდაძე, სალომე კაცაძე

ყვარლის ღვინის კლუბის საპროექტო ტერიტორია მდებარეობს კახეთის რეგიონში, ქალაქ ყვარელში. საპროექტო საზღვრებში მოქცეულია სასტუმრო, ღვინის ქარხანა, ვენახები და ველური ბუნებით დაფარული ჭალები. ტერიტორია დაყოფილია ზონებად, რომლებსაც ახალი კონცეფციის შექმნამდე ნიშანდობლივი ურთიერთკავშირი, ან რაიმე გამაერთიანებელი სტრუქტურა არ გააჩნდათ.

ტერიტორიის შესწავლისას გამოიკვეთა, რომ ჭალაში არსებული დამშრალი ნაკადულის კალაპოტი ქმნის წრიულ ფორმას. წრე, როგორც ადგილის ხასიათის სიმბოლო პროექტის წამყვან კონცეფციად იქცევა. დამშრალი ნაკადულის კალაპოტი, ბუნებრივ გარემოში მინიმალური ჩარევით, საფეხმავლო ბილიკის ფუნქციას იძენს და გენერალური გეგმის ცენტრალური ცირკულაციის ღერძი ხდება, რაც ამარტივებს ტერიტორიის სრულად აღქმას და სასურველ ადგილებთან წვდომას.

პირველსავე ეტაპზე განისაზღვრა ახალი ინტერვენციების ფერი - შაბიამნისფერი. მევენახეობაში ფართოდ დამკვიდრებული ეს ბუნებრივი ფერი გადაიქცა არსებულ გარემოსთან მაკონტრასტებელ ელემენტად და ამავდროულად, გააერთიანა ყველა ახალი ფუნქცია და ინტერვენცია.

ფუნქციური პროგრამის ჩამოყალიბება მნიშვნელოვანწილად განსაზღვრა რეგიონისათვის დამახასიათებელმა, ისტორიულ-ვერნაკულარულმა ტრადიციებმა, რომლებიც თანხვედრაშია თანამედროვე რეგენერაციული აგრიკულტურის პრინციპებთან. მაგალითად, როგორიცაა ვენახში ცხოველების, კერძოდ ცხვრის გამოყენება ბალახის საფარის კონტროლისთვის.

კონცეფცია ითვალისწინებს წარმოსახვითი ბადის მეშვეობით ფუნქციების მთელს ტერიტორიაზე განაწილებას, რაც პერიმეტრის უკვე არსებული თარგის ანალიზით გამოვლინდა.

ფუნქციებისთვის კონკრეტული ადგილების შერჩევისას, არსებულ ზონირებასთან ერთად, გათვალისწინებულია ბადის გადაკვეთის წერტილები, სადაც განსაკუთრებული ყურადღება ექცევა ბუნებრივი რესურსების გამოყენებას. ბადეში დატოვებული ცარიელი წერტილები კი, პროექტის სამომავლო განვითარების შემთხვევაში, მათი სხვადასხვანაირად დატვირთვის საშუალებას იძლევა.

ახალი ფუნქციების განაწილებითა და უკვე არსებული ზონების განვითარებით გენგეგმაში ვიღებთ 7 ძირითად ზონას - მეღვინეობას, მევენახეობას, ჭალას, ფერმერულ სივრცეს, მეხილეობას, პერსონალის სივრცეს და ავტოსადგომს.

ტერიტორიაზე არსებული შესაძლებლობების ანალიზით და დაგეგმილი აქტივობების სინთეზით, ჩვენს მიერ შემუშავებული გენერალური გეგმა ქმნის რეგენერაციულ აგრიკულტურაში თანამონაწილეობის შესაძლებლობას, რაც გულისხმობს უშუალო ჩართულობას ისეთ აქტივობებში, როგორიცაა იქვე დაკრეფილი ხილისგან კომპოტის, ხოლო ადგილობრივი ნედლეულისგან კერძების მომზადება, მევენახეობის ზონაში ყურძნის კრეფა, შეგროვება, დახარისხება და სხვ.

ყვარლის ღვინის კლუბის ტერიტორიაზე განთავსებულია სასტუმრო, რომელიც განახლებამდე მოიცავდა ფუნქციებს, როგორიცაა სასტუმრო ოთახები, რესტორანი, ბარი, საკონფერენციო დარბაზი, ბოულინგის ოთახი, ბილიარდის ოთახი, ტენისის კორტი და ღვინოთერაპიის სპა.

არსებული სასტუმროს განახლებული განვითარების კონცეფციით ამოქმედებისთვის, აუცილებლობას წარმოადგენს ახალი ფუნქციების გაჩენა და არსებული გეგმარების ცვლილება, რაც უზრუნველყოფს ახალი პროგრამის და ფუნქციების გამართულ ურთიერთკავშირს.

დამატებული ფუნქციები მოიცავს ელემენტებს, როგორიცაა რესტორნის ახალი, დამატებითი სივრცე, რომელიც განთავსებულია არსებული რესტორნის მომიჯნავედ ტყის მხარეს. კიბე, რომელიც უფრო გვიან აშენებულ შენობას აკავშირებს ღია აუზთან, აუზის ბართან და ამავდროულად წარმოადგენს საევაკუაციო ობიექტს. სასტუმროს მიმღებში შესასვლელი, რომელიც სასტუმროს ტერიტორიაზე მოხვედრისას, უბიძგებს სტუმარს მიმღებისკენ.

ჩამოთვლილი ახალი ელემენტების დიზაინის კონცეფციის ჩამოყალიბება ეფუძნება არსებული გამოყენებული მასალების მაქსიმალურად შენარჩუნებას, მინიმალურ ჩარევას არსებულ არქიტექტურულ კომპოზიციაში და ამავდროულად განხორციელებული ინტერვენციის მკვეთრი აქცენტებით ხაზგასმას, რაც გამოხატულია შერჩეული მასალების, ფორმისა და ფერთა გამის მეშვეობით.

სასტუმროს ინტერიერის დიზაინის კონცეფცია ითვალისწინებს დამსვენებლისთვის მყუდრო და ამავდროულად მრავალფეროვანი პირადი და საერთო გამოყენების სივრცეების ფორმირებას.

MUA-ს გუნდის მთავარი გამოწვევა იყო სასტუმროს საერთო თავშეყრის სივრცეებში უკვე არსებული მასალების მაქსიმალურად შენარჩუნება. აქედან გამომდინარე, დიზაინის ენა, სწორედ არსებული და შემოთავაზებული მასალების სინთეზით არის ჩამოყალიბებული, რომლებიც ქმნის ელეგანტურ კონტრასტს და ერთგვარ ჰარმონიულ გარემოს უკვე არსებულ შენობაში.

სასტუმროს არსებული და ახალი ფუნქციების შედეგად მიღებული ძირითადი სივრცეებია მიმღები, რომელიც მოიცავს რეგისტრაციის, თავშეყრისა და სამუშაო სივრცეს. რესტორანი, სადაც ბარისა და საუზმის სივრცეები გამიჯნულია ერთმანეთისგან ფერისა და ფორმის აქცენტების მეშვეობით. სასტუმროს ნომრები, რომელთა გადაწყვეტა ეყრდნობა მარტივი, ბუნებრივი, ელეგანტური ფერისა და ფორმის შერწყმას. ღვინის ბანკი, რომელშიც ინახება საკოლექციო ღვინის ბოთლები დომინანტ მასალებად შერჩეულია ბუნებრივი ხის მასალა და უჟანგავი ფოლადი. ღვინის ბანკის თავშეყრის სივრცეში შექმნილია გარემო კონტრასტული მასალითა და ფერით, რომელშიც სტუმრებს შესაძლებლობა აქვთ დააგემოვნონ წარმოდგენილი კოლექციების ღვინო.

სასტუმროსთან ერთად, ყვარლის ედემის ტერიტორიაზე განთავსებულია ღვინის ქარხანა. ქარხნის შიდა სივრცე დაყოფილია ფუნქციურ ზონებად, რომელიც სტუმრებს საშუალებას აძლევს ცხადად შეიგრძნონ ღვინის დაწურვის კახური ტრადიციები.

ღვინის კლუბის მთავარი შესასვლელიდან მიმღებში ვინაცვლებთ, საიდანაც შეგვიძლია მოვხვდეთ ქვევრების საცავში, პუპიტრების დარბაზში, შემდეგ კი პარტნიორების სივრცეში, აქვე განთავსებულია ღია საწარმოო სივრცე, სპირტის სახდელი, ტარას და ბოთლების საწყობების სივრცეები, რომელთა ინტერიერიც ღვინის კულტურის დეტალებითაა გაჯერებული.